Die wat gimnastiek al op TV gesien het sal weet wat ‘n balanseer balk is en sal seker al gesien het die oefeninge wat gimnaste daarop doen.
Op skool het ek my altyd verkyk aan hierdie ding en my verwonder oor hoe dun daardie balk werklik is en het ek respek gekry vir die wat hierdie sportsoort beoefen. Vir enige persoon om hom of haar te balanseer op hierdie balk en dit regkry om regop te bly op hierdie balk, weet beslis wat hulle doen!
Soos julle weet belowe die Bybel nêrens vir ons ‘n maklike lewe vol melk en heuning nie. Vir ons is die lewe soos ‘n balanseer balk waarop jy jou toertjies van die lewe moet doen. Wat ons baie keer vir die HERE moet doen is angswekkend en baie moeilik, maar ons doen dit nogtans, want die Bybel sê vir ons in Mattheus 16:27 “Want die Seun van die mens staan gereed om met sy engele in die heerlikheid van sy Vader te kom, en dan sal Hy elkeen vergeld volgens sy dade.” Dis waarom ons hierdie waaghalsige toertjies op die balanseer balk van die lewe doen, omdat alles wat ons nou deurgaan eendag ryklik beloon gaan word! Maar dis meer as dit, ons doen dit ook om ons liefde vir die HERE te bewys!
Vir party van ons is die lewe maar taamlik rof. Ek wil julle vertel van iemand, maar omdat ek die persoon se privaatheid respekteer, gaan ek nie name noem nie. Hierdie persoon se ma is oorlede tydens sy geboorte. Sy pa het later weer getrou. Toe hy nege jaar oud word, het sy stiefma in ‘n motor ongeluk omgekom. Sy pa het toe vir ‘n derde keer getrou, maar op twaalfjarige ouderdom is sy pa aan kanker oorlede. Die enigste direkte familie wat hy oorgehad het was sy oom en tannie. Op sestien jaar het sy oom sy tannie in een of ander argument dood geskiet voor hy homself dood geskiet het. Hierdie persoon was 16 jaar oud en sy hele wêreld het sopas in duie gestort!
Die lewe is vol onstabiliteit net soos om op ‘n balanseer balk te loop, maar as iets soos dit met sommige Christene gebeur, dan gaan sit hulle wydsbeen oor daardie balanseer balk gaan sit en klou die balk vas met albei arms! Ons wil so graag die HERE dien, maar as dinge so bietjie uit balans raak, dan gaan sit ons plat op die balanseer balk en klou vir lewe en dood! As daardie persoon na baie jare sterf, dan staan hy of sy skielik voor die troon van die Vader en spring in die lug op met albei arms uitgestrek na bo soos iemand wat nou net die mees komplekse toertjie uitgevoer het! Watse punt dink julle gaan die Vader vir jou vertoning op die balanseer balk van die lewe gee?
As enige een van ons na die Olimpiese Spele kyk en die gimnas kom op die balk uitgestap; gaan sit wydsbeen oor die balk; klou vir drie minute vir lewe en dood aan die balk vas; klim dan stadig af en spring in die lug op met albei hande uitgestrek, wat se punt dink julle sal daardie gimnas kry? Wat gaan die beoordelaars op hulle punte state skryf?
Wat skokkend is, is dat dit presies die roetine is wat so baie Christene volg! Ek wil niks buitengewoon doen nie, want ek wil nie val nie! Eendag gaan hulle van die balk moet afklim en besef dat hulle voor die Heerser van die Hemel en Aarde staan! Wat gaan ons doen? Voor die HERE staan met leë hande? Dink julle die HERE gaan sê: “Mooi so goeie en getroue dienskneg? Jy het die veiligste lewe gelei wat daar denkbaar is! Jy het nooit gegly nie en jy het nooit geval nie! Goed vir jou!”
Liewe leser, dis nie die lewe wat die HERE vir jou ingedagte het nie, maar dis waar die meeste mense heen op pad is! Die vraag wat jy jouself moet vra is of jy wil wees waar die meeste mense is en of jy eerder wil uitstaan?
Ja, die lewe is moeilik en daar is oomblikke wat mens tot in jou siel bang raak vir omstandighede buite jou beheer, maar met die HERE aan ons sy, kan ons oor berge spring! Waarom dan aan die balk gaan vasklou? Glo jy dan nie dat die HERE jou uit elke situasie kan red nie?
Die geheim is om nie te gaan sit en moed op te gee nie. Dis waar dat slegte dinge gebeur en dat ons nie altyd beheer daaroor het nie, maar dis wanneer slegte dinge gebeur en jy opstaan en sê dat my omstandighede nie gaan dikteer wie ek is nie, dis dan wanneer jy begin om ‘n verskil te maak!
Die Bybel sê vir ons in Mattheus 7:21 “Nie elkeen wat vir My sê: Here, Here! sal ingaan in die koninkryk van die hemele nie, maar hy wat die wil doen van my Vader wat in die hemele is.” Die HERE gaan jou nie beloon as jy niks gedoen het nie. Net soos in die Olimpiese Spele, wen jy net as jy die beste is! Wees daarom die beste wat jy kan wees vir die HERE! Prys Sy Naam!
Mag die HERE hierdie boodskap aan julle harte seën!