Blinde Leiers van blindes

Deel hierdie boodskap op Sosiale Media
image_pdfLaai afimage_printDruk

Jesus het hierdie boodskap vir my gegee en Hy dring daarop aan dat ek dit moet bring. Ek vertrou dat dit vir iemand bedoel is.

Soos julle weet was Jesus baie in die spervuur van die Fariseërs en die Skrifgeleerdes. Dis omdat hy hulle valsheid geken het en geweet het dat hulle die volk verkeerd leer. Dit laat my dink aan dit wat ons vandag sien… Genoeg gesê!

In Mattheus 15 lees ons van die oorlewering van die oumense. Julle kan die gedeelte self gaan lees as julle wil, maar dit gaan in kort oor een van die Tien Gebooie waar God ons beveel dat ons ons vaders en ons moeders moet eer sodat ons dae op aarde verleng mag word. (Eksodus 20:12) Maar die Fariseërs van Jesus se tyd het die mense geleer dat as jou vader of jou moeder by jou bly en van jou afhanklik is, dan is dit ‘n offergawe wat jy maak en dan hoef jy hulle glad nie te eer nie!

Hierdie is natuurlik teenstrydig met God se bevele, want nêrens in God se Woord word daar so ‘n uitsondering gemaak nie. Dis waarom Jesus vir hulle in Mattheus 15:9 dat hulle God vereer deur die leringe van mense; omdat hulle God se Gebod gevat het en dit aangepas het om by die wil van die mens te pas! Soos verwag het die Skrifgeleerdes en die Fariseërs aanstoot geneem oor hierdie woord.

Hier kom die waarskuwing en dis eerstens gemik op die wat die Woord van God verkondig onder die mense. God se Woord is nie ‘n gewildheid kompetisie nie. Die Woord van God is daar vir lering en teregwysing; nie om jou goed te laat lyk voor die mense nie. Moenie ‘n Skrifgeleerde of ‘n Fariseër wees wat hou van die voorste plekke in die vergaderings, vir die skyn lang gebede doen en daarvan hou om deur die mense gesien en vereer te word nie. Moenie ‘n blinde leier van blindes wees nie, want dan gaan julle al twee in die sloot val!

Vir julle wat luister sê Jesus die volgende: moenie alles glo wat julle hoor net omdat iemand sê Jesus-sê-so en dan het Jesus glad nie so gesê nie! Beproef die woord en moenie die een wat die boodskap bring vereer nie. Die eer kom God toe en God deel Sy eer met niemand nie! Daardie persoon wat die Woord van God bring doen die Wil van God. Hy is net ‘n gesant en moet daarom nie vereer word nie. Moenie ‘n blinde wees wat blind agter ‘n blinde leier aanloop nie! As jy dit doen, gaan julle albei in die sloot val!

Mag die HERE hierdie boodskap seën!

image_pdfLaai afimage_printDruk
Tagged , , , , .