Vandag gaan ons so ‘n bietjie stilstaan by die Wet van Moses waarvan die Tien Gebooie deel is van en ons gaan kyk of die Wet nog op ons as Christene van toepassing is.
Paulus het hom op verskeie plekke in die Nuwe Testament ten sterkste uitgespreek teen die wat verkondig het dat die Wet van Moses deur die Kerk onderhou moes word. Hy het dit die “Juk van Diensbaarheid” genoem omdat dit presies wat die Wet van Moses is; ‘n swaar juk wat moeilik is om te dra en te onderhou.
Die Wet van Moses met al sy bepalings is aan die Israeliete van ouds gegee om hulle in bewaring te hou vir die dag as Jesus gebore sou word. Die wet van Moses was nooit bedoel om permanent in gebruik te bly nie. Jesus self sê in Lukas 4:18-19 die volgende: “[18] Die Gees van die Here is op My, omdat Hy My gesalf het om die evangelie aan die armes te bring. Hy het My gestuur om die wat verbryseld van hart is, te genees; [19] om aan gevangenes vrylating te verkondig en aan blindes herstel van gesig; om die wat gebroke is, in vryheid weg te stuur; om die aangename jaar van die Here aan te kondig.” Let op wat hier geskryf staan, liewe leser! Hierdie hele gedeelte gaan oor genesing en bevryding! Genesing van sondes en bevryding van die juk van die wet, want dit is wat die wet was: ‘n swaar juk wat moeilik tot onmoontlik was om te dra wat nog te sê van onderhou!
Die van julle wat slim is sal weet dat hierdie gedeelte ook die mandaat is wat ek van die HERE ontvang het toe ek met Suider Kruis begin het! Ons is vry deur die wonderlike Naam van Jesus sodat ons self kan besluit oor reg en verkeerd! Ons het nie ‘n wet nodig om vir ons te sê wat reg en wat verkeerd is nie. Die Gees van die HERE sal ons daarvan oortuig! Prys Sy Naam! Verder kan ons bid vir wysheid en dat sal aan ons gegee word by oorvloed!
Omdat ons as mense altyd ‘n wet soek om rigting aan ons lewens te gee, het Jesus verder gegaan en vir ons die Groot Gebod gegee soos dit in Mattheus 22:37 – 40 opgeteken is: “[37] Jy moet die Here jou God liefhê met jou hele hart en met jou hele siel en met jou hele verstand. [38] Dit is die eerste en groot gebod. [39] En die tweede wat hiermee gelykstaan: Jy moet jou naaste liefhê soos jouself. [40] Aan hierdie twee gebooie hang die hele wet en die profete.”
Jesus eindig hierdie vers deur in vers 40 te sê dat aan hierdie nuwe twee gebooie hang die hele wet en die profete en dis waar! As jy jou naaste lief het, dan sal jy nie steel, roof of moor nie. Jy sal nie die vrou of die man van jou naaste begeer nie en jy sal ook nie enige eiendom wat jou naaste het begeer nie. Die hele tien gebooie is in hierdie gebod opgeneem, behalwe een; en dit is die een wat sê dat jy nie op ‘n Sondag mag werk nie.
So watter verandering is dus gemaak? Jesus het die wet verander van een wat sê jy moet ‘n stel reëls nakom of sterf na een wat sê genade en naasteliefde. Dis waarom ons nie meer vrouens of mans wat owerspelig is stenig nie. Verstaan julle?
Waarom skep mense dan al hierdie reëls en regulasies en waarom hou hulle so daaraan om diensbaar vir die HERE te wees? Omdat die wet orde verseker inplaas van naasteliefde. Dis makliker om vir iemand te sê die Bybel sê so as om vir daardie persoon te sê dat Jesus hom of haar lief het. Mense hou daarvan om mag oor ander mense uit te oefen en die wet was die perfekte middel om daardie mag mee uit te oefen!
Soos ek reeds gesê het, het Paulus hom op ‘n geleentheid sterk teen die onderhou van die Wet van Moses deur die vroeë kerk uitgespreek. Ons vind dit in Handelinge 15 waar Paulus na ‘n groot woordestryd opgestaan het en vir die gemeente hierdie bekende vraag gevra soos in vers 10 opgeteken: “Nou dan, waarom versoek julle God deur op die nek van die dissipels ‘n juk te lê wat ons vaders en ook ons nie in staat was om te dra nie?” Julle sien, dis wat die wet doen; dit plaas groot druk op mense om ‘n stel reëls te volg en dit nadat ons vrygemaak is deur die waarheid!
In Galasiërs 5:1-9 spreek Paulus homself ten sterkte uit oor die onderhouding van die wet. “[1] Staan dan vas in die vryheid waarmee Christus ons vrygemaak het, en laat julle nie weer onder die juk van diensbaarheid bring nie.”
Daar rus op ons wat Kinders van die Allerhoogste God is GEEN verpligting om enige deel van die Wet van Moses te onderhou nie. Moenie jou steur aan mense wat jou anders vertel nie, selfs al is hulle langer in die geloof! Jy is vry deur Jesus Christus en jy hoef nie jou vryheid prys te gee om enige iemand op aarde gelukkig te maak nie!
Om die waarheid te sê; waarsku Paulus ons om nie die Wet van Moses of enige van sy bepalings te onderhou nie. “[2] Kyk, ek, Paulus, sê vir julle dat as julle jul laat besny, Christus vir julle tot geen nut sal wees nie. [3] En ek betuig dit weer aan elke mens wat hom laat besny, dat hy onder verpligting is om die hele wet te onderhou. [4] Julle wat geregverdig wil wees deur die wet, is losgemaak van Christus; julle het van die genade verval.” (Galasiërs 5:2-4)
As jy dus die Wet van Moses wil onder hou; selfs as jy net sekere bepalings daarvan onderhou, dan is jy verplig om die hele Wet te onderhou. Jy kan dus nie net sekere bepalings onderhou en die res uitlos nie. Iemand wat die Wet van Moses onderhou is losgemaak van Jesus en Sy genade en jy kan daarom nie meer staatmaak op die genade wat daar vir ons uitgestort is nie. So iemand doen afstand van die genade waardeur hy/sy geroep is en dan het Christus se dood aan die kruis vir hulle geen doel meer nie. Sien julle hoe gevaarlik dit is om die Wet te onderhou? Jy staan ‘n kans om alles te verloor!
“[5] Want óns verwag deur die Gees uit die geloof die geregtigheid waarop ons hoop. [6] Want in Christus Jesus het nòg die besnydenis nòg die onbesnedenheid enige krag, maar die geloof wat deur die liefde werk. [7] Julle het goed geloop: wie het julle verhinder om die waarheid gehoorsaam te wees? [8] Hierdie oortuiging kom nie van Hom wat julle roep nie.” (Galasiërs 5:5-8)
Die Wet van Moses dra geen krag vir die wat in Christus Jesus glo nie. As jy eers die vryheid ervaar het wat saam met Jesus kom, waarom wil jy dan weer terug gaan om die wet te onderhou? Waar kom hierdie oortuiging vandaan? Beslis nie van die HERE af nie!
“ [9] ‘n Bietjie suurdeeg maak die hele deeg suur. [10] Ek vertrou van julle in die Here dat julle nie anders sal dink nie; maar die een wat julle in die war bring, sal die oordeel dra, wie dit ook mag wees.” (Galasiërs 5:9-10)
Een persoon wat verkondig dat die wet onderhou moet word, sal baie mense se lewens aantas, maar wee hierdie persoon wat hulle so in die war bring, want hy sal die oordeel dra, ongeag wie dit ook al mag wees!
Daar is wolwe wat in skaapklere rondloop in die Gemeente. Moenie die vryheid wat jy in Christus het verkoop vir ‘n stel reëls wat vandag geen betekenis meer het nie. Gebruik die Gees van die HERE vir leiding! As jy moet werk op ‘n Sondag dan moet dit so wees. Onthou dat liefde vir Jesus en liefde vir jou naaste is wat tel en nie hoeveel reëls jy nakom nie! As jy dus wysheid kortkom, bid dit van die HERE, want hy sal dit in oorvloed gee sonder enige verwyt!
Prys die Wonderlike Naam van Jesus!
