Perfekte berou

Deel hierdie boodskap op Sosiale Media
image_pdfLaai afimage_printDruk

Wie van julle het al so ‘n ondervinding gehad waar Jesus jou op so ‘n manier verbaas dat jy letterlik niks kan sê nie?

Ek lees Sondag weer die gedeelte wat ek vir julle gepos het en skielik kom die stem van die HERE tot my. Ek kon dit duidelik hoor soos wat ek met enige iemand anders sou gesels het en die stem het gesê “Jou geloof het jou gered.” Dit is die titel van die boodskap, maar skielik het ek die doel agter die boodskap 100% verstaan!

Ons dra baie keer swaar laste vir Jesus en ek kla nou glad nie daaroor nie, want vir my is dit ‘n plesier om dit vir Jesus te kan doen sodat die Koningryk kan uitbrei. Ek verstaan dat daar siele is wat sukkel om hulle kruise te dra en daarom help ek hulle graag dra. Jesus het my sonde vir my gedra en daarom is dit nou meer as net reg vir my om dieselfde te doen. Party dae is die kruis wat ek dra besonder swaar en is julle gebede al wat my staande hou.

Hoe baie keer het ek nie al gewens dat ek vlekkeloos en sonder sonde voor die HERE kan wees nie, maar ek weet dat solank ek ‘n mens is in ‘n sondige liggaam, dit nie moontlik is nie. Ek is ook ‘n mens met swakhede net soos julle en baie keer as ek daar onder in die modder lê, dan wonder ek of die genade van die HERE groot genoeg gaan wees vir my om geneem te word in die wegraping. Ek weet daar vir van julle wat dieselfde wonder, want die Gees het dit vir my gewys.

En dis waar Jesus se woorde ingekom het en ek skielik 100% verstaan het: “Jou geloof het jou gered.” Baie van ons gaan gered word deur ons geloof in Jesus! Dis tyd dat ons ‘n slag verby ons sondige lewe kyk en na onsself kyk soos Jesus na ons kyk. Jesus kyk na die bedoeling van die hart en na die uiterlike nie. Struikel blokke gaan daar altyd wees en dit moet ook so wees, want dis hoe Jesus ons slyp. Moet jouself dus nie loop en skop as jy struikel nie en moet ook nie gaan lê nie, maar staan eerder op en loop verder.

As jy jou pad loop met die verwagting dat jy sonder sonde gaan wees en so jou pad Hemel toe wil verseker, dan kan ek jou net hierdie versekering gee en dit is dat jy gaan vaal. Daar is geen manier hoe jy ooit regverdig genoeg sal wees daarvoor nie. Net deur Jesus se genade en jou geloof gaan jy gered word en dit geld vir elkeen van ons. Moet dus nie jouself probeer regverdig nie. Wees eerder perfek berouvol oor jou oortredinge.

Liewe leser; Jesus het jou lief: selfs met al jou vuil en modder kolle! Hy weet hoe frustrerend dit vir jou is om vordering te maak net om weer te vaal. Daarom wil Jesus vandag vir jou sê dat jy moet ophou om so hard te probeer om perfek te wil lewe. Wees eerder perfek berouvol oor jou oortredings. Jesus sal jou nie agterlaat solank as wat jy berou het oor jou oortredings nie.

Tel nou jou kruis op en dra dit met waardigheid die res van die pad. Dis nie meer lank nie, dan gaan Jesus kom om daardie kruis van jou skouers af te haal en dan gaan dit nooit ooit weer ‘n las wees wat jy gaan moet dra nie.

Prys die Wonderlike Naam van Jesus!

image_pdfLaai afimage_printDruk
Tagged , , , .

One Comment

  1. Amen! Dis so waar – as daar slegs één mens was, is of sal wees wat met sy eie krag ‘n sondelose lewe gelei het – selfs nie een keer gefaal het nie, sou Jesus se mensword en ondenkbare lyding oorbodig gewees het. Daarin lê ook vir my die troos wanneer ek struikel. Jesus Christus se offer Bloed is álles vir ons redding.

    As ek ook iets mag deel…: Net eergister het ek aan iemand gesê dat ons dade van geregtigheid uit gehoorsaamheid en verseker in en deur die Krag van die Heilige Gees in ons is – nie tot selfvoldane selfregverdiging nie!

    Ook…: Die Kruis wat ek moet dra – het die Heilige Gees aan my gewys is; om God in álles te bly aanbid, te vertrou, lief te hê, in Sy Woord te bly; om waarlik lief te hê; nederig te bly; sagmoedig te wees; álmal volkome te vergewe wat my leed aan doen of te na kom; in die Gees te wandel; te volhard; ander wat swaar kry ook te bemoediging; op my knieë te bly; om te besef – te wéét, dat selfs my vaste vertroue – geloof in onse hemelse Vader en onse Here Jesus Christus deur God aan my gegee is! Het Hy nie die Mosterdsaadjie geskape nie? Daardie saadjie wat ek ook lank terug ontvang het… Dat wanneer ek roem, ek alleen God moet loof prys en aanbid – want álles wat ek het wat tot my redding gekom het, van Hom ontvang is. Dat elkeen wat in Jesus Christus glo in Sy Ewige Hand bewaar word…

    Baie dankies nogmaals vir die bemoedigende Boodskappe – God se rykste seën aan u en u familie.

Comments are closed.