Jesus se teekoppie

Mag die soete teenwoordigheid van Jesus ons altyd tot oorlopend toe volmaak sodat ons geen behoefte na die dinge van die wêreld sal hê nie.

In hierdie wêreld word ons gedurig gekonfronteer met voorbeelde van mense wat baie verder in die lewe gevorder het as ons. Sommige van daardie oorwinnings wat hierdie mense behaal het, het met groot ‘n groot prys gekom sodat hulle hulle drome kon bewaarheid, maar daarvan weet ons nie altyd nie.

In die Geestelike lewe is dit geensins anders nie. Ons ontmoet gedurig mense wat geestelik verder gevorder het as ons en dan lyk dit vir ons asof die HERE hierdie mense meer lief het as ons, maar dis glad nie so nie. Die HERE het vir ons hierdie voorbeelde gegee sodat ons daaruit moet leer, maar satan en sy trawante probeer ons jaloers maak op hierdie mense.

Julle weet, ons het twee keuses: ons kan hulle oorwinnings saam met hulle vier of ons kan wegsink in ‘n poel van jaloesie en met die HERE redeneer: “Waarom nie ek nie? Wat is so spesiaal aan hulle?” Die HERE het ons hierdie voorbeelde gegee om saam met hulle bly te wees en ons is gegrief en bitter?

Die geheim om hierdie gif te vermy is maklik en dit is om in die besemkas te gaan wegkruip en die een te wees wat die vloere van die HERE skrop tot Hy jou daar kom uithaal! Waarom, omdat dit baie meer vervullend is om Jesus gelukkig te hou as om bekommerd te wees oor die eer van die wêreld. Bly daarom in die besemkas terwyl ander aangekondig word en hulle krone ontvang.

Die gevaar wat prestasie inhou is dat dit baie keer vergesel word deur ‘n gees van ambisie wat weer kan veroorsaak dat ons ver buite ons vermoëns wil presteer of dat ons meer wil presteer as wat ons die HERE wil hê. Hierdie is iets wat ons gedurig voor moet oppas.

As dit by prestasie kom, is sommige van ons tee koppies is vir die HERE, ander is weer emmers en ander weer balies. Die HERE het ons almal gemaak sodat ons verskillende kapasiteite kan hê. Die teekoppie hou die minste van al die voorwerpe. Die balie hou ‘n enorme klomp water; genoeg om emmers en teekoppies mee vol te kan maak, maar die balie staan buite die huis. Die balie versamel water en niemand sal ooit ‘n balie in sy huis inbring nie! Die emmer tap water uit die balie uit en dit word in die huis ingebring, maar niemand drink ooit tee uit ‘n emmer uit nie! Dis waarvoor die teekoppie daar is! Dis die teekoppie wat Jesus na Sy lippe toe bring om uit te drink!

Watter een wil u dus wees liewe leser? Wil u die balie wees wat baie kan hou, die emmer of die teekoppie waaruit Jesus drink? Om die kleinste te wees is dus nie altyd ‘n vloek nie; dis jou uitkyk op die lewe wat die verskil maak! Wees dus gelukkig hoe Jesus jou gemaak het, want Hy het ‘n doel daarmee gehad. Eendag gaan Jesus kom vir Sy Kinders en dan gaan Hy vir jou wat so klein is en in ‘n besemkas wegkruip daaruit kom haal en dan gaan almal jou sien! Wees daarom bly oor wie jy is.

Mag die HERE hierdie boodskap aan julle harte seën!